Рэкамендавана навукова-метадычнай установай “Нацыянальны iнстытут адукацыi” Міністэрства адукацыі Рэспублікі Беларусь. Кніга ахоплівае найбольш ужывальную, тэматычна згрупаваную лексіку, якая адлюстроўвае навакольны і ўнутраны свет дзіцяці. Тлумачэнне і засваенне слова даецца не толькi праз малюнак, але і праз жыццё яго ў сказе. Словаўжыванне выступае ў сказах выразна, досціпна, з гумарам. Матэрыялы “Чую, бачу, гавару” дапамагаюць выдатна вучыцца і плённа бавіць вольны час, атрымліваць дадатковыя веды па розным школьным прадметам. Кніга з’яўляецца унікальнай энцыклапедыяй навакольнага свету на беларускай мове. Даспадобы прыйдзецца выданне як дапытлівым вучням, так і іх бацькам. “Чую, бачу, гавару” змяшчае больш чым шэсцьдзесят тэм са школьнай праграмы пачатковых класаў. Кожная тэма падаецца па прынцыпу ад простага да складанага. Гэта робіць выданне яшчэ і карысным для дзяцей, якія сутыкаюцца з цяжкасцямі ў пабудаванні лагічных ланцужкоў і вынікаў. Дапаможнік можа стаць асновай для распрацоўкі індывідуальных картачак, творчых заданняў. У хатняй падрыхтоўцы – базай для падрыхтоўкі да дыктовак слоўнікавых слоў і самаправеркі вучняў. Пададзены ў слоўніку тэматычны лексічны матэрыял можна вывучаць і не прытрымліваючыся прапанаванай паслядоўнасці. Ён будзе цудоўным дапаможнікам і для старэйшых дашкольнікаў. Для подпісаў пад малюнкамі ў кнізе, выкарыстаны багацейшы рэсурс беларускай мастацкай літаратуры. Радкі з твораў класікаў Янкі Купалы, Якуба Коласа, Максіма Багдановіча, Н. Гілевіча і сучаснікаў Э. Агняцвет, В. Віткі, А. Вольскага, , В. Жуковіча, Ул. Ліпскага, Ул. Мацвеенкі, М. Танка, К. Цвіркі, М. Чарняўскага, – ператвараюць маляўнічы слоўнік у сапраўдную літаратурную скарбонку! Калі гартаецца гэта каляровае выданне, узнімаецца настрой, становіцца весялей пазіраць навокал і пазнаваць свет. Распрацаваны з улiкам практычнага вопыту лепшых замежных выданняў падобнага тыпу. Адрасуецца вучням пачатковых класаў школ з беларускай i рускай мовамi навучання.
